БҚО-да 50 ауылдың халқына таза су жеткізу көзделуде

ОРАЛ. ҚазАқпарат - Батыс Қазақстан облысында биыл 50 ауылдың халқына таза су жеткізу көзделуде, деп хабарлайды «ҚазАқпарат» тілшісі.

Облыс әкімі Алтай Көлгіновтің айтуынша, тұрғындарды толғандырып жүрген, жергілікті басшылық белгілеген басты бағыттың бірі - алыс елді мекендерді таза ауыз сумен қамту.

«2016 жылы өңірдегі 443 елді мекеннің 37 пайызы ғана орталықтандырылған су көзіне қосылған еді. Елбасының тапсырмасын орындау мақсатында, Парламент депутаттары мен Үкіметтің қолдауымен өткен жылы 13 млрд теңгеге 60 ауылға таза ауыз су жеткізу жұмыстарын бастадық. Нәтижесінде көрсеткішті 40 пайыздан асырдық. Осы ауылдарда 77 мың халық тұрады. Қазір облыстың 178 елді мекеніне ауыз су жеткізілген. Бөлінген қаржының 9 млрд теңгесіне 1100 шақырым су құбыры тартылды. Жұмыстар жалғасуда», деді Алтай Көлгінов.