Бейбіт Ыстыбаев биылғы «Қазақстан Барысынан» өз еркімен бас тартты - Сәрсен Құранбек
- Осымен жетінші мәрте жалауы желбірегелі отырған қазақ күресінен «Қазақстан Барысы» турнирінің финалына жолдама алған балуандар толығымен анықталды. Біз дәстүр бойынша алдымен ауылдық, аудандық, одан кейін облыстық белдесулерден іріктеліп шыққан балуандарға ғана финалдық айқасқа жолдама бердік. Енді, шілденің 2-сі күні еліміздің 14 облысы мен Астана, Алматы қалаларында жеңімпаз атанған 34 балуанның ішіндегі ең мықтысын, яғни «Қазақстан Барысы-2017» атағының иегері кім болатынын елорда тұрғындары мен қала қонақтары өз көздерімен көретін болады. Мүмкін биыл жаңа чемпион шығып қалуы да ғажап емес. Үш рет «Қазақстан Барысы» атанған Бейбіт Ыстыбаев биыл өз еркімен турнирге қатысудан бас тартты.
- Не себепті бас тартқаны туралы толығырақ айтып өтсеңіз...
- Ол бұрындары үш дүркін «Қазақстан Барысы» атансам болды деп алдына мақсат қойған. Сол дегеніне қол жеткізді. Алғаш рет 2012 жылы чемпион атанса, араға екі жыл салып, 2015 және 2016 жылдары қатарынан бас белдікті қанжығасына байлап, үш дүркін жеңімпаз атағына қол жеткізді. Биыл демалайын деген болу керек. Бұл турнирге қатысу-қатыспау әр балуанның өз еркі. Ешкім-ешкімді күшпен жарысқа қатыстырмайды. Сондықтан біз Бейбіттің шешіміне келісім бердік.
- Келесі жылы қайта қатысамын десе де өз еркі ғой...
- Әрине! Бірақ, келесі жылы қатысамын десе, өзге балуандар сияқты іріктеуге қатысып, облыстық жарыста жеңіп шығуы керек. Ал биыл өткен жылы чемпион болғаны үшін іріктеуден тыс қатысуға мүмкіндігі бар еді. Алайда, өз еркімен жарысқа қатысудан бас тартып отыр.
- «Қазақстан Барысы» турнирінен кейін «Әлем Барысы» халықаралық турнирі өтетінін білеміз. Мүмкін Бейбіт сол додаға дайындалып жатқан болар...
- Оған Бейбіттің қатысу-қатыспауын бапкерлер кеңесі анықтайды. Оны Бейбіт өзі шешпейді.
- Әңгімеңізге рахмет!