Бейбіт Шүменов Қанат Исламның промоутері екенін жоққа шығарды

АСТАНА. ҚазАқпарат - Өткен түнде BoxRec сайтында кәсіби боксшы, жартылай ауыр (WBA super) және бірінші ауыр (WBA) салмақ дәрежесіндегі әлем чемпионы Бейбіт Шуменов қазақстандық боксшы Қанат Исламнның промоутері болды деген ақпарат пайда болды. Барлық БАҚ-на бұл ақпараттың жалған екендігін жеткіземіз, деп хабарлады Бейбіт Шүменовтың баспасөз қызметі.

«Менің Қанат Исламмен промоутер ретінде жұмыс істейтіндігім туралы БАҚ бетінде пайда болған ақпарат шындыққа сай келмейді. Ия, менің Лас-Вегас қаласында тіркелген KZ Event Productions, Inc. деп аталатын жеке проумоутерлік компаниям бар. Әрине, болашақта біздің жігіттерге әлемдік аренада жетістіктерге қол жеткізіп, еліміздің атағын шығаруларына көмектесуді жоспарлап отырмын, - деді Бейбіт Шүменов.

Естеріңізге салсақ, қазақстандық кәсіби боксшы 29 қаңтарда денсаулығына байланысты бірнеше жылға үзіліп қалған спорттық мансабын қайта жалғастыратынын хабарлаған болатын.

Бейбіттің айтуынша, қазір оның денсаулығы жақсы және шаршы алаңға жаңа қарқынмен шығуға дайын.