Бекман Сойлыбаев GGG-дің бұрынғы қарсыласымен бір рингте жұдырықтасады
Бокс әлеміндегі танымал порталдардың бірі boxingscene.com ақпаратына сәйкес, 19 қазандағы ең басты кездесуді орта салмақтың саңлағы Габриэль Росадо (23-11, 13 KOs) мен Глена Тапиа (23-4, 15 KOs) өткізеді. Осы тұста айта кетерлігі, Габриэль Росадо мен Геннадий Головкин 2013 жылы қаңтар айында қолғап түйістірген болатын. Айқастың нәтижесі бойынша, қазақстандық чемпион қарсыласын жетінші раундта техникалық нокаутпен жеңді. Головкин сол жолы өзінің кәсіби бокстағы 25-ші жеңісіне қол жеткізген еді.
Бокс кешінде сонымен қатар, мексикалық Алехандро Баррера (27-3, 17 KOs) америкалық Кеандре Гибсонмен (17-1-1, 7 KOs) қолғап түйістіреді. Америкалық Франциско Эсперанза (6-0, 2 KOs), Израэль Дуффустың (15-4, 12 KOs) қарсыластары жуық арада анықталмақ. Ал қазақстандық Бекман Сойлыбаев сол кеште Фернандо Варгаспен шаршы алаңға шығады.
Бокс кешінің шымылдығын алты раундтық айқаста екінші жартылай салмақтағы Ренди Морено (9-1, 8 KOs) мен Хесус Агинага (5-5-2) ашады.
Доданың барлығын танымал спорттық телеканал Golden Boy Boxing тікелей эфирде көрсететін болады.
Бұған дейін хабарлағанымыздай , 19 қазан күні Бекман Сойлыбаев өзінің WBC International чемпиондық белбеуін қорғайтын болады. Бекманның қарсыласы - мексикалық Фернандо Варгас. Кәсіпқой шаршы алаңда 47 айқас өткізген 29 жастағы Варгас, соның 32-сінде жеңіске жеткен, үш жекпе-жегі тең аяқталған. Кәсіпқой бокспен 2006 жылдан бері айналысып келеді. Өз кезегінде кәсіпқой бокста 11 айқас өткізіп, барлығын жеңіспен аяқтаған жерлесіміз екінші жеңіл салмақ дәрежесіндегі WBC International чемпиондық белбеуінің иегері. Бүгінде Бекман Сойлыбаев Лос-Анджелесте белгілі маман Эрик Браунның қарамағында жаттығып жүр.