Байқоңырдан «Прогресс МС-08» жүк кемесі алғаш рет жаңа үлгімен ұшырылмақ
«Прогресс МС-08» көліктік жүк кемесі бар «Союз-2.1а» зымыран-тасығышының ұшырылымы 2018 жылдың 11 ақпаны Астана уақытымен 14 сағат 58 минут 45 секундқа жоспарланған.
КЖК-ны зымыран-тасығыштың 3-ші сатысынан бөліп, кемені белгіленген орбитаға шығару ұшырылымнан кейін тоғызынша минутта жүргізілетіні күтілуде.
«Прогресс МС-08» көліктік кемесін ХҒС-ға жақындату және түйістіру жұмыстарын Ұшуды басқару орталығының мамандары мен ресейлік ұшқыштар - Александр Мишуркин мен Антон Шкаплеровтың бақылауымен автоматты режімде жүргізу жоспарлануда.
Әдетте «Прогресстер» ХҒС-қа екі тәуліктің ішінде барады, алайда бұл жолы алғаш рет ғарыш кемесі жаңа үлгі бойынша ұшырылмақ. Алдын ала есеп бойынша, кеме станцияға 3 сағат 27 минутта жетуі тиіс.
«Прогресс МС-08» кемесі Халықаралық ғарыш станциясына екі тоннадан астам жүкті, соның ішінде отын, ауа, станцияны жұмыс жағдайында ұстап тұруға арналған жабдықтар, экипаж мүшелеріне қажетті заттарды жеткізеді.