Бақытжан Сағынтаев «Нұрлы жол» бағдарламасының қаржысын толық игеруді тапсырды
«Елбасы жұмыс бабындағы кеңес өткізіп, мемлекеттік бағдарламаларға қатысты бірқатар орынды сын-ескертпелер айтқан болатын. Оның барлығы біздің жұмысымызда ескеріліп, Мемлекет басшысының тапсырмалары орындалуы қажет. Осыған байланысты сіздердің назарларыңызды бірқатар маңызды жайттарға аударғым келеді»,-деді Премьер-Министр Үкімет мүшелеріне қаратып айтқан сөзінде.
«Біріншіден, кеңес барысында Елбасы жеті айдың қорытындысы бойынша «Нұрлы жол» мемлекеттік бағдарламасын жүзеге асыру барысында бөлінген қаржының тек 40 пайызы игерілгеніне назар аударды. Бұл өз кезегінде бағдарламалар әкімшілері қаржының басым бөлігін екінші жартыжылдықта игеру тәжірибесін жалғастырып отырғанын білдіреді. Жауапты меморгандар мен әкімдіктер осы мәселені тұрақты қадағалауда ұстауы тиіс», - деп тапсырды Б. Сағынтаев.
Бұл тұрғыда Білім және ғылым министрлігіне білім беру нысандарының құрылысы барысын бақылау жүктелді.
«Ұлттық экономика министрлігі ай сайынғы негізде нысандардың уақытылы пайдалануға берілуі үдерісіне мониторинг жүргізіп, Үкіметке мәліметтерді енгізуі тиіс. Ерлан Кенжеғалиұлы (Білім және ғылым министрі), қыркүйектің басында мектептердің құрылысы бойынша қарастыратын боламыз. Атап айтқанда, 1 қыркүйекке дейін қосымша 48 мектепті пайдалануға беру жоспарланып отыр», - деді Үкімет басшысы.