Бағаланбай қалған батырлар: Исатай СҮЙЕУБАЕВ

АСТАНА. ҚазАқпарат - Жеңіс күні қарсаңында «ҚазАқпарат» ХАА есімі ұмыт қалған Кеңес Одағының Батырлары туралы материалдар жариялайды. Материалдарды жариялауға «Бағаланбай қалған батырлар» жинағының авторы Берік Әбдіғалиұлы көмек көрсетті.

Берік Әбдіғалиұлының атап өтуінше, бұл жинақта сөз қозғалатын батырлардың есімі жалпақ жұртқа мәлім емес. Олардың атымен аталған көше немесе мектептер жоқ. Қан майданда ерлік көрсеткенін жанындағы жолдастары көрсе де, штаб және партия басшылығы оларды мойындамаған. Біздің міндетіміз - бағаланбай қалған батырлар жайында келешек ұрпаққа әңгімелеп беру.

Исатай СҮЙЕУБАЕВ - 1913 жылы Гурьев облысы Маңғыстау ауданы №18 ауылында дүниеге келген. Соғыс жылдарында 293-ші атқыштар дивизиясында автоматшы болды. 1942 жылы қараша айында жасаған ерлігі үшін 21-ші армияның командованиесі Исатай Сүйеубаевты Кеңес одағының батыр атағына ұсынғанымен ол тек Ленин орденімен марапатталады.

Соғыста жарақат алған соң 1944 жылы елге оралып, 1948 жылы қайтыс болады.