Атырау жұртшылығы жазушы-драматург Рахымжан Отарбаевпен қоштасты
Шұрайлы шығармалары Қазақстан ғана емес, шет елдерге де танымал болған ерекше дарын иесі, ҚР еңбек сіңірген қайраткері, халықаралық Шыңғыс Айтматов атындағы академиясының академигі, «Парасат» орденінің иегері, Атырау қаласы мен Құрманғазы ауданының құрметті азаматы Р.Отарбаевпен қоштасу Махамбет атындағы Атырау облыстық академиялық қазақ драма театрында өтті.
Жазушы-драматургпен қоштасуға Астана мен Алматыдан, Қазақстан өңірлерінен делегациялар, сондай-ақ шет елдерден Рахымжан Отарбаевты құрмет тұтып, жақын араласқан азаматтар келді.
Қаралы жиында Атырау облысының әкімі Нұрлан Ноғаев жазушының қайталанбас тұлғасына тоқталып, оның есімі ешқашан ұмытылмайтынын жеткізді.
"Рахымжан Отарбаевтың қазасы туған жері Атырау өңірі ғана емес, оның шығармаларын оқып, қойылымдарын көрген барша Қазақ елінің қабырғасын қайыстырып кетті. Шүкіршілік ететіні, соңында ізі де, сөзі де, көзі де қалды. Енді оның атқара алмай кеткен істерін аяқтау - кейінгі ұрпаққа парыз", - деді өңір басшысы.
Қаралы жиында, сондай-ақ, театр және кино тарланы, Қазақстанның Еңбек Ері Асанәлі Әшімов, ақындар, "Қазақ әдебиеті" газетінің бас редакторы, Қазақстан Жазушылар одағы басқармасы төрағасының орынбасары Жанарбек Әшімжан, Ақұштап Бақтыгереева және басқалар азалы сөзін арнады.
"Сонау ғасырлардағы ұлылар мен сал-серілердің жалғасындай болған Рахымжан Отарбаев сөзі ғана емес, жүріс-тұрысына дейін ешкімге ұқсамайтын дара тұлға еді. Көркем прозасы өз алдына, Бейбарыс, Махамбет, Құрманғазы сынды ұлылардың театрдағы бейнесін сомдап кетті. Бұл бір адамға аз дүние емес. Айтматовтың өзі жоғары бағалаған Рахымжанның екінші, мәңгілік өмірі енді басталды" - деді Асанәлі Әшімов.
Р.Отарбаевтың қазасына орай жеткен жеделхаттар да оқылды.
Бір шүкіршілік ететін жайт, небәрі 62 жасқа қараған шағында дүниеден озған жазушы-драматургтің соңында мол мұрасы қалды. Басқасын айтпағанда, өзі жазып кеткеніндей, 40 баспа табақ орысша кітабы және 7 томдығы әзірге жарық көрген жоқ. Ендігі мақсат шығармашылық жолын өлеңнен бастап, қазақ әдебиетінің қабырғалы өкілдерінің біріне айналған қаламгердің еңбектерін жинастырып, баспадан шығарып, халыққа жеткізу болса керек.
Еске сала кетейік, белгілі жазушы-драматург Рахымжан Отарбаевтың өмірден озғаны туралы бұдан бұрын жазылған болатын.