Астананы «Сергек» камераларымен қамту 1 маусымға дейін аяқталады

АСТАНА. ҚазАқпарат - Бүгін Астана әкімі Әсет Исекешев, Премьер-Министрдің орынбасары Асқар Жұмағалиев, Бас прокурордың орынбасары Марат Ахметжанов  Ситуациялық орталыққа барып, «Сергек» жобасын іске асыру мәселесін талқылады, деп хабарлайды ҚазАқпарат қала әкімдігінің сайтына сілтеме жасап. 

Асқар Жұмағалиевке «Сергек» фото-бейне тіркеу жүйесінің барлық мүмкіндігін таныстырып, «Qamqor» айыппұл төлеу жүйесі мен әкімшілік құқық бұзушылықтың бірегей тіркеуін көрсетіп шықты. 

Әсет Исекешев «Сергек» камерасын орнату және «нөлдік төзімділік» қағидасын іске асыру арқасында, орта есеппен қылмысты - 30 пайызға, ал жол-көлік оқиғаларын 18 пайызға төмендету мүмкін болғанын айтты.   

Таныстыру барысында вице-премьер Асқар Жұмағалиев ІІМ-ге Бас прокуратура мен ІІМ ақпараттық жүйесін біріктіру процедурасын жеделдетуді тапсырды. 

Бүгінде камера орнатудың бірінші кезеңі аяқталды. Қалада 6 365 камера біріктіріліп, орнатылды. Бүкіл қаланы «Сергек» камерасымен қамту 2018 жылдың 1 маусымына дейін аяқталмақ. 

Әрі қарай делегация «Astana LRT» кеңсесінің жұмысымен танысты. Басқарма төрағасы Бекмырза Игенбердинов қаладағы интеллектуалды транспорт жүйесін яғни бағдарламалық-аппараттық кешен көрсетіп шықты Ол бағдаршамдар мен бейнебақылау жүйесін орталықтан басқаруға мүмкіндік береді. Мамандар ITS жобасы шеңберінде аялдамаларға жолаушыларға автобустың келу уақыты туралы ақпараттандырып тұратын табло орнатылғанын түсіндірді. Таблоға қажеттілік туындаған жағдайда ТЖ мен басқа да алдын ала белгісіз жағдайлар туралы қосымша ақпараттарды орналастыруға болатынын айтты.     

Диспетчер орталығына келген қонақтар тәулік бойы жедел режімде жүргізіліп жатқан орталықтандырылған басқарманың тасымалдау процесімен де танысты. Арнайы экранда қаланың картасы және қозғалыс кестесін бақылайтын индикаторлы барлық автобустың жағдайы көрсетілген. Қызыл - бұл озып кету, сары - қалып кету, жасыл - кестені сақтау. Аталмыш картаға үзіліс болған жағдайда, схема өзгерген кезде, ТЖ барысында автобустардың статусы өзгергені көрсетіледі. 

Асқар Жұмағалиев барлық функциялар қалалықтардың өмірін ыңғайлы әрі айтарлықтай жақсарта түсетінін айтты. 

«Біз бүгін жобаның дайын екенін көрдік, дұрыс жұмыс жасалып жатыр, Әкімдік тұрғындардан түскен шағымдар мен өтініштерге жедел әрекет білдіріп нәтиже шығаруда. Бізге енді тағы бір маңызды жұмысты қолға алу қалды - барлық ақпарат қолжетімді болатын мобильді қосымшаны соңына дейін аяқтау. Өйткені, енгізілген технология біз бен сіздің қауіпсіздігіміз бен жайлылығымызды қамтамасыз етеді, демек қалалықтар үшін  оған қолжетімділік барынша қарапайым болуы керек», - деді вице-премьер. 

Бүгінде жолаушылар автобусын 500 мыңнан астам тұрғындар қолданады. 

Нысанға келгеннен кейінгі қорытынды бойынша барлық жауапты қызметке  сәйкес тапсырмалар берілді.