Астанадағы Жамбыл облысының жәрмеңкесіне 300 тонна өнім жеткізіледі

АСТАНА. ҚазАқпарат - 24-25 қыркүйек күндері Астанада өтетін жәрмеңкеге Жамбылдан арнайы керуен аттанды. 15-тен астам жүк көлігімен Елордаға 300 тоннадан астам ауылшаруашылық өнімдері жеткізіледі.

Облыс әкімінің баспасөз қызметінің хабарлауынша, жамбылдық тауар өндірушілердің қатысуымен өтетін жәрмеңкеге 30-дан астам өнім түрлері қойылады. Жалпы құны - 237,5 млн теңге. Оның ішінде 10 тонна жылқы, 1,4 тонна тауық еті, 5 тонна шұжық , 10 тонна сүт өнімдері , 11 мың дана жұмыртқа, 1,5 тонна кондитерлік және 6 тонна макарон өнімдері, бар. Сондай-ақ астаналықтарға 10 тонна қант, 0,5 тонна тұз, 5 тонна балық, 2,2 тонна бал, 4,2 тонна қымыз бен шұбат және 245,3 тонна жеміс-жидек пен көкөністер ұсынылады.

Сапалы, дәмді, табиғи таза базар бағасынан құны төмен тауарларды елорда тұрғындары алдағы екі күнде ескі орталық алаңнан сатып алуға мүмкіндіктері бар.
Естеріңізге сала кетейік аталған іс-шара Қазақстан Республикасы Тәуелсіздігінің 25 жылдығына орай Астана қаласындағы «Тарихы терең Тараздан тағзым» атты Жамбыл облысының күндері аясында ұйымдастырылып жатыр.