Астанада «Сергек» жүйесі арқылы 523 қылмыстық іс ашылды
Бүгін бас қаладағы ахуал орталығына Астана қаласының әкімі Әсет Исекешев пен «Атамекен» ҰКП Президиумының төрағасы Тимур Құлыбаев келді. Сапар барысында олар ІТ технология саласындағы Қазақстанның ең бірінші экспорт өнімдерімен танысты.
Мамандар фото-бейнетіркеу жүйесін енгізудің артықшылықтары туралы айтып берді. Мамандардың айтуынша, камераның арқасында қылмыстар айтарлықтай азайған. «Сергек» камерасын орнату орта есеппен алғанда қылмыс санын 30 пайызға, жол-көлік оқиғаларын - 18 пайызға төмендеткен.
«Көлік жүргізушілерінің тәртібі күшейді. Одан басқа, 500-ден астам қылмыстық іс ашылды, оның ішінде 4 кісі өлімі бар», - деді Әсет Исекешев.
Әкімнің сөзіне қарағанда, қазіргі таңда қоғамдық орындарда адамның түр-әлпетін тани алатын жүйені енгізу жұмыстары жүргізіліп жатыр. Бұл жаңашылдық (ноу-хау) полицейлердің жұмысына көп көмегін тигізеді, яғни ТЖ жағдайы мен жаппай төбелесті тәртіп сақшылары гаджет арқылы көре алады. Бұл жағдайды бағалауға және тиімді әрекет жасауға мүмкіндік береді. Сондай-ақ, бүгінде жүйе қасақана тәртіп бұзушылар мен қарызы барларды да автоматты түрде анықтап бере алады.
Тимур Құлыбаев жүйенің жұмысына оң баға беріп, жекеменшік бизнес аумағында да камера орнатуда бірігіп әрекет жасауға уәде берді.
Бүгінде қалада 6365 камера біріктіріліп, орнатылған. 1 маусымға дейін Астанада 13 мың жол камерасын монтаждап, іске қосуды жоспарланып отыр.