Астанада мұқтаждарға нан тегін таратылуда
Әкімдіктің мәліметінше, «Рухани жаңғыру» бағдарламасы бойынша Астанада көмекке мұқтаж азаматтарды тегін түрде азық-түлікпен қамту бойынша қайырымдылық акциясы өткізіліп жатыр. Әр апта сайын ұйымдастырушылар «Шапағат» коммуналдық базарында, Жеңіс даңғылындағы 55-үйде, І. Есенберлин көшесіндегі 2\1-үйде; Ғ. Мұстафин көшесіндегі 13-үйде орналасқан «5 минут» супермаркет желісінің үш дүкенінде тегін 120-200 бөлке нан таратады.
Аталмыш акция халықтың әлеуметтік жағынан осал топтарына, қарт адамдарға қолдау көрсетуге бағытталған.
Сондай-ақ, «Қайырымдылық. Доброта» жобасы жүзеге асырылуда. «Көктал» көлік бөлшектер әмбебап базары маңында (Көктал, 18) әлеуметтік жағынан аз қамтылған отбасылар үшін арнайы бутик ашылды. Ондағы тауарларға баға қойылмаған. Кез-келген азаматтар бутикке мұқтаж жандар алып кететін киім-кешек, аяқ киімдер, ойыншықтар мен кітаптарды әкеліп қоя алады.