Астанада көлік тізгінінде отырып телефонмен сөйлескен 64 автобус жүргізушісіне айыппұл салынды

АСТАНА. ҚазАқпарат - Астана қалалық ІІД Жергілікті полиция қызметі қаңтардың 26-28 аралығында «Автобус» жедел алдын алу шарасын өткізді, деп хабарлайды қала әкімдігінің сайты.

Шара жолдағы апаттылық деңгейін төмендету, жүргізушілердің көлік жүргізу тәртібін нығайту және жол қозғалысын бақылауды күшейтуге бағытталды.

«Үш күн бойы тәртіп сақшылары қалалық автобустардың бағдарға шығар алдындағы техникалық жағдайын, жүргізушілердің тіркеу құжаттарының бар-жоғын, медициналық тексеруден және техникалық бақылаудан өткен-өтпегенін тексерді. Шара барысында автобустарды нормативтер мен стандарттарды бұза отырып басқару және пайдалану, көлік құралдарын заңсыз қайта жабдықтау деректері анықталды», делінген хабарламада.

Шараның қорытындысы бойынша полиция қызметкерлері жол жүру ережесін бұзудың 500-ге жуық оқиғасын тіркеді, соның 53-і маневрлеу ережелерін бұзу және 4 дерек қозғалыс барысында жаяу жүргіншілерге жол бермеу оқиғалары болды. Нәтижесінде автобус парктерінің 12 лауазымды тұлғасы әкімшілік жауапкершілікке тартылды, 16 автобусты пайдалануға тыйым салынды. Автобус басқарып келе жатып ұялы телефонмен сөйлескені үшін 64 жүргізушіге айыппұл салынды.