«Алтын белгіге» үміткерлердің 93,5 %-ы өз білімдерін дәлелдеді - ҚР БҒМ

АСТАНА. ҚазАқпарат - 29 мамыр мен 9 маусым аралығында қазақстандық мектептерде түлектер қорытынды аттестациядан (мектеп бітіру емтиханы) өтті. Оған 5180 мектептен 125 482 түлек қатысты - барлық емтихан оқу орны бойынша мектеп базасында өтті, деп хабарлайды ҚР БҒМ баспасөз қызметі. 

Қорытынды аттестация 5 пән бойынша өтті, олардың 4-еуі міндетті пән, біреуі таңдау пәні.

125 482 түлектің 35 419-ы (28,2 %) өте жақсы бағаға, 58 347 (46,5 %) - жақсы, 31 603 (25,1 %) түлек қанағаттанарлық, ал 113-і (0,02%) қанағаттанбайтын бағаға тапсырып шықты.   

Түлектердің өз білімін дәлелдегені жоғары пайызды көрсетті - орта білім бойынша «Алтын белгіге» үміткерлер 5656 (93,5 %) және өте жақсы баға бойынша аттестат алғандар - 4670 (100 %) түлек болды. Әділдік және ашықтық болуы үшін әрбір мектепте ата-аналар комитетінің, қоғамдық бірлестіктің өкілдері, пән мұғалімдері емтихан комиссиясының құрамына кірді.
Мектептердің 125 482 түлегі өз ана тілдерінде эссе жазып, 26,2% - «5»,    46,5% - «4» деген баға алды.

Математика пәні бойынша түлектердің - 22,6% - «5», ал 43% - «4» деген бағаға ие болды.

Тест бойынша өткен емтиханда физикадан 27 258 түлектің 36,4% - «5», 36,3% - «4», ал 17 түлек «2»-ге тапсырды.

Химия пәні бойынша 3073 түлектің 58,0% - «5», 29,7% - «4»-ке лайықты деп табылды, ал 3 түлек «2» деген баға алды.

Сондай-ақ географиядан 40374 түлектің 59% - «5», 33,5% - «4» деген бағаға ие болса, 4 түлек «2» алды.

Биология пәні бойынша 42 119 түлектің 39,2% - «5», 37,6% - «4» деп бағаланса, ал 11-і «2» алды.

Информатика пәнінен 286 мектеп бітірушінің 61,5% - «5» алса, 19,6% - «4» деген бағаға ие болды.

Екінші пән бойынша (орыс, өзбек, ұйғыр және тәжік тілдерінде оқытатын мектептерде қазақ тілінен және қазақ тілінде оқытатын мектептерде орыс тілінен) 125 482 түлектің 43,2% - «5»-ке тапсырды, 30,3% - «4» алды. 

Ағылшын тілі пәні бойынша 10006 түлектің 73% - «5», ал 18,6% - «4» алды.