Алматының салықшылары Нұрлан Абдуллинді ханға «айналдырды»

АСТАНА. ҚазАқпарат - Алматы қаласы бойынша мемлекеттік кірістер департаменті бақылау-кассалық машинасының артықшылығын түсіндіру үшін белгілі әнші Нұрлан Абдуллинді Салық ханға «айналдырған», деп хабарлайды ҚазАқпарат.

Алматы қаласының мемлекеттік кірістер департаменті бұл видео арқылы қазыналық мәліметтерді сақтайтын функциясы бар бақылау-кассалық машинасының пайдасын көрсетпек болған екен.

Видео авторлары  бұның креативті жолың таңдап, Салық ханның хандығындағы оқиғаны баяндаған. Яғни, бұрын Қазақстанның кәсіпкерлері тауар чегін шығарып бергенмен, ескі машинадағы мәліметтер қазынашылыққа қолма-қол жетпесе, сервисте сақталмайтын еді. Ал, қазір қолданыс аясы кеңейіп келе жатқан бақылау-кассалық машинасы чек шығарып қана қоймай, қазынашылыққа тікелей қосылған. Осы машина арқылы кез келген саудагер берген чектің мәліметтері қазынашылыққа тікелей жетіп отырады.

Роликтегі Салық ханның рөлін белгілі әнші Нұрлан Абдуллин сомдаса, қалған кейіпкерлерді салық департаментінің қызметкерлері ойнап шыққан екен.

Видеода  «хандықта» тұратын халық ескі аппаратты емес, бақылау-кассалық машинасын таңдап, «қазыналық мәліметтерді сақтайтын бақылау-кассалық машинасы кез келен жерде жолыңызды ашады», деп ұрандатады.