Алматыда үнді қызының тағдыры туралы фильм түсірілді
Қазақфильм баспасөз қызметінің хабарлауынша, кинотуындыға Хуши Девани атты үнді қызының тағдыры арқау болған. Сүйіп қосылған күйеуінен қорлық көрген ол, Алматыға келіп, жұмысқа орналасып, биіктерден көрінеді. 
Естеріңізге сала кетсек, былтыр Шәкен Айманов атындағы «Қазақфильм» АҚ Болливудтың «Khushi Motion Pictures» атты компаниясымен ынтымақтастық туралы келісімшартқа қол қойған болатын. Бірлескен өндіріс жөніндегі келісім бойынша, екі жақ «Love you family» толықметражды көркем фильмінің дистрибуциясы саласында қызмет етуге міндеттелген. 
- Фильмнің Үндістандағы прокаты табысты болды. Қазақстанда ешқашан болмаған біздің көрермендер үшін Алматы қаласының әдемі көріністерін тамашалау қызықты болды. Қазақстанның Мәдениет және спорт министрлігіне және мәдениет министрі Арыстанбек Мұхамедиұлының жеке өзіне сенім білдіріп, қолдағандары үшін алғыс айтамыз. Сонымен қатар, «Қазақфильм» киностудиясына түсірілім кезінде кәсіби деңгейде көмек көрсеткендеріне алғысымыз шексіз. Бірлесіп түсірген туындымыздың сәтті шыққанына қуаныштымын. Менің білуімше, Қазақстанда үнді фильмдерін сүйіп тамашалайтын көрермендер көп, сондықтан да бұл фильм қазақстандықтардың көңілінен шығады деп ойлаймын, - деді фильмнің продюсері Випул Девани. 
Үнді режиссері Сачиндр Шарм түсірген «Туған үйім - тірегім» фильмінің түсіру жұмыстары Үндістанда және Тайландта өтті. Картинаның негізгі қойылымдары Қазақстанда, айта кетсек, Алматы қаласының көрікті жерлерінде түсірілді (Республика алаңы, «Арбат», Шымбұлақ және Көктөбе).
Фильмге үндінің танымал актерлері - Пардасани Акша Сунил, Джоши Маной Наванет, Салман Юсуф Кхан, Шакти Капур, Навни Парихар түскен. Бұл картинада қазақстандық танымал актер Фархат Абдрайымов та бой көрсетеді.
«Қазақфильм» киностудиясында қазақ тіліне дубляждалған (орыс тілінде субтитрлары бар) «Туған үйім - тірегім» атты үнді мелодрамасы еліміздің кинотеатрларында 14 желтоқсаннан бастап көрсетілетін болады.
«Туған үйім - тірегім» ( «Love you family») фильмі отбасы құндылықтары туралы баяндайды. Үлгілі үнді отбасының шаңырағында туған Хуши есімді бойжеткен, ата-анасының қарсылығына қарамастан, биден дәріс беретін Раджа есімді жігітке ғашық болады. Қос ғашық жасырын үйленіп, шаңырақ көтереді. Алайда, кенеттен бәрі де өзгереді. Сүйіп қосылған күйеуі танымастай өзгеріп, Хуши далада қалады. Уақыт өте жақындарының қолдауымен бойжеткен Алматыға келіп, жұмысқа орналасып, биіктерден көрінеді.
Khushi Motion Picture - 2012 жылы үнді киногері Бхушан Шарма негізін қалаған Болливудтың ірі компанияларының бірі. Бүгінде компанияда Үндістан кинематографиясында танымал жазушылар, техника мамандары, актерлер мен продюсерлер, режиссерлер мен музыканттар жұмыс істейді.