Алматы облысында жоғалып кеткен үш ағайынды өлі күйінде табылды
Бұл туралы аймақтық Ішкі істер департаменті баспасөз қызметінен мәлім етті.
«Облыстық ІІД басшысының бірінші орынбасары подполковник Нұрлан Мәсімов басшылық еткен іздеу шараларына аудандық және аймақтық полицейлер де жұмылдырылды. Жоғалғандарды өлтірді деген күдікпен Жамбыл ауданының екі азаматы ұсталды. Жәбірленушілердің денелері табылды. ҚР ҚК 99-бабы, 2-бөлімі бойынша (Кісі өлтіру) қылмыстық іс қозғалды», - делінген баспасөз қызметінің хабарында.
Кісі өлтіру фактісі бойынша тергеу жұмыстары Алматы облыстық Ішкі істер департаменті басшылығының қатаң назарында.
Еске салайық, Көксу ауданының үш тұрғыны жоғалғаны туралы полицейлерге азаматтардың туыстары хабарлаған. Ауыл тұрғындарының айтуынша, үш ағайынды 40 бас ірі қара малды сату үшін шалғайдағы Жамбыл ауданына бет алған. Олар туыстарымен соңғы рет байланысқа 19 қыркүйек күні шыққан.