Ақтөбедегі оқиғадан кейін Қазақстанда барлық автобустар тексеріледі

АСТАНА. ҚазАқпарат - 18 қаңтар күні болған Ақтөбе облысындағы апатқа байланысты ҚР ИДМ Көлік комитетінің инспекция қызметкерлері мен ҚР ІІМ қызметкерлері бірлесіп бүкіл Қазақстан бойынша «Автобус» жедел-профилактикалық шарасын өткізеді, деп хабарлайды ҚазАқпарат.

«22 қаңтар мен 18 ақпан аралығында өтетін жедел-профилактикалық шара аясында ауданаралық, қалааралық, облысаралық және халықаралық қатынаста жолаушыларды және багажды тасымалдайтын көліктер мен жүргізушілер тексерілетін болады. Жолаушыларды тасымалдайтын автобустардың және таксилердің техникалық ақауы болса әрі қауіпсіздік талаптары сақталмаған жағдайда, көлікті одан әрі пайдалануға тыйым салатын шаралар қабылданады», - деп атап өтілген ҚР ИДМ баспасөз қызметінің хабарламасында.

Бұдан бөлек, жасырын маршруттарды анықтау үшін көліктік бақылау инспекциясының қызметкерлері мен қоғам өкілдерінен тұратын мобильдік топтар құру туралы шешім қабылданды.

«Рейс алдында автомобильдің міндетті техникалық және жүргізушінің медициналық байқаудан өтуіне, жүргізушілердің еңбек және демалыс режимін сақтауларына баса назар аударылады. Республикамыздың автомобиль жолдарындағы жолаушылар мен багаж тасымалдау мәселелері бойынша «Рубеж» қарау-бақылау бекеттерінде бақылауды күшейту жөнінде қосымша шаралар қабылданады», - делінген министрлік мәліметінде.