Ақтөбеде ұстазын соққыға жыққан оқушыларға қатысты тергеу шаралары жүргізілуде - ІІД
Ақтөбе облыстық ІІД баспасөз қызметі ағымдағы жылдың 20 қазанында қаланың 23 жастағы тұрғынын соққыға жығу фактісі бойынша материал ҚР Қылмыстық кодексінің 107-бабы бойынша сотқа дейінгі тергеу тізіліміне тіркелгенін атап өтті.
«Аталған қылмысты жасады деген күдікке қаланың 1999 жылы дүниеге келген 4 тұрғыны ілігіп отыр. Қажетті барлық тергеу шаралары жүргізілуде», - делінген таратылған ақпаратта.
Айта кетейік, аталған өңірдің «Диапазон» басылымның жазуынша, 4 оқушы ұстаздарын соққыға жығып, қолын сындырған.
«Оқиға сабақтан соң, түстен кейін орын алған. Біздің 11 сынып бірінші ауысымда оқиды. Жанжалдың неден шыққанын білмейміз. Онымен полиция айналысып жатыр», - дейді оқиға орын алған мектеп директорының орынбасары Бибінұр Қабатбергенова.
Басылымның жазуынша, жас маманның бұл мектепте жұмыс істей бастағанына небары 2 ай ғана болған. Ал оны соққыға жыққан оқушылар сабақтарын жақсы оқыған.