Ақтаулық оқушылар көмекке мұқтаж балаға ақша жинап берді
Олар қаражатты «Менің пайдалы асым» атты жәрмеңке ұйымдастыру арқылы жинаған. Қайырылымдық акциясына ұстаздар мен оқушылар, қала тұрғындары қатысты.
«Мектебімізде осы апта химия,биология және экология апталығы өтіп жатыр. Апталық аясында балаларға пайдалы ас ішуді насихаттағымыз келді. Сол себепті осындай жәрмеңкені ұйымдастырдық. Ұстаздар дұрыс тамақтану рецепті бойынша әзірленген астарды пісіріп әкеліп, жәрмеңке барысында ағзаға пайдасы туралы айтып тұрды. Шарадан 61 мың теңге жинадық. Сатылымнан түскен қаржыны қатерлі ісік дертіне шалдыққан Шымкент қаласындағы Назарбаев Зияткерлік мектебінің оқушысы Ордабек Райымбектің еміне көмек болсын деп салып жіберуді ұйғардық», - дейді шараны ұйымдастырушы, биология пәнінің мұғалімі Гүлжан Нүсіпжанова.
Қалған 60 мың теңге қыркүйектің 21-і күні зияткерлік мектептердің оқушылары ұйымдастырған «Ұлы дала мұрагерлері» концерті барысындағы қолөнер бұйымдарының көрмесінен түскен қаражат.
«Облыстық деңгейде ұйымдастырылған концертте оқушылардың өз қолымен жасаған көздің жауын алар бұйымдар қала тұрғындарына сатылған еді. Сол себепті екі шараның қаржысын бірге салып жібердік», - деді мектеп директорының тәрбие ісі жөніндегі орынбасары Алтынзер Ихсанова.
