АҚШ-тың трансұлттық компаниясы елордалық саудагердің үстінен шағым түсірді

АСТАНА. ҚазАқпарат - Астана қалалық әділет департаментіне «The Proctel & Gamble Company» компаниясының өкілі шағымданып, Астанадағы «BIG Шанхай» сауда үйіндегі тауарларға тексеріс өткізуді сұрады, деп хабарлайды ҚазАқпарат тілшісі.

Тексеріс кезінде тұрмыстық химия өнімдерін сатумен айналысатын бір жеке кәсіпкердің тәртіп бұзғаны анықталды. Оның сауда алаңында контрафактілік тауарлар сатылды. Атап айтқанда, ыдыс-аяқ жууға арналған «Fairy» атты өнімнің штрих-коды астындағы цифрлар анық басылмаған. Ондай тауарлар контрафактіге жатады.

«Астана қаласының мамандырылған ауданаралық әкімшілік соты жеке кәсіпкерді Әкімшілік құқық бұзушылық туралы кодекстің 158-бабы бойынша жауапкершілікке тартып, 21 АЕК (50 505 теңге) көлеміндегі айыппұлды төлеуге міндеттеді. Контрафактілік тауардың барлығы мемлекеттің пайдасына тәркіленді. Сот қаулысы заңды күшіне енді», - делінген соттың ресми хабарламасында.