Ақмола облысында ер адам прокуратура қызметкері мен полицейді жаралады
"20 шілде күні сағат 14.35-те "Фольксваген Пассат" көлігіне мінген белгісіз біреу Целиноград прокуратурасының әкімшілік ғимаратының маңында прокуратура жұмысшысы мен Целиноград аудандық ІІБ қызметкеріне оқ жаудырған. Қызметкер жұмыс бабымен сол маңда болған", - деп хабарлады ІІД өкілдері.
14.45-те жедел-іздестіру шараларының барысында көлік табылып, ондағы күдіктінің мәйіті анықталды. Ол өзінің жүрек тұсынан атқан.
61 жастағы ер адамның қылмыстық іс бойынша сотталушы ретінде күдікке ілінгені анықталды. Ол сыбайлас жемқорлыққа қарсы іс-қимыл қызметі тергеп жатқан ақшалай қаражатты жымқыру дерегі бойынша күдікке ілінген.
Қазіргі таңда қару тәркіленіп, сараптамаға жолданды. Тергеу жүріп жатыр. Зардап шеккендердің жағдайы тұрақты, оларға уақтылы медициналық жәрдем көрсетілді.