Ақан Сатаев «Тұмар патшайым» фильміне кастинг жариялады
«ҚР Мәдениет және ақпарат министрлігінің тапсырысы бойынша «Қазақфильм» киностудиясы «Sataifilm» компаниясымен бірлесіп, мамырдың 15-16-сы күндері Ақан Сатаевтың ең ауқымды «Тұмар» көркем фильміне кастинг жариялайды», - делінген режиссер Ақан Сатаевтың Инстаграмдағы парақшасында.
Аталған хабарламада кастингтің мына мекен жайда өтетіндігін айтылған: Астана қаласы, Ілияс Есенберлин көшесі 10, «Жастар» театры. Сағат 9-00-ден 18-00-ге дейін. Жас санаты: 16-жасқа дейін, ұлтына шектеу жоқ.
Айта кетейік, Ақан Сатаев «Тұмар» фильмін түсіретіндігін осыдан екі айдан астам уақыт бұрын ҚР Мәдениет және спорт министрлігінің кеңейтілген отырысында мәлім еткен болатын.
«Осы жылы біз Мәдениет министрлігімен бірлесіп «Тұмар» тарихи фильмін түсіруді бастағалы отырмыз. Сапалы дүние шыққан жағдайда ол отандық көрерменнің де, шетелдік аудиторияның да қызығушылығына ие бола алатынына сенімдімін. Тұмар патшайым - әлемдік тарихтің барысына ықпал еткен тұлға. Кинопрокатымыздың географиясын кеңейту үшін мұндай жобаларды жасау керек деп санаймын. Себебі бұл елдің халықаралық имиджінің қалыптасуына оң әсер етеді», - деген еді режиссер.
Сонымен фильмнің түсірілім жұмыстары 2017 жылдың қазан айында басталып, 2018 жылдың ақпан айына дейін Қазақстан аумағында жүргізіледі. Тарихи жобаның авторлары: Әлия Назарбаева мен Тимур Жақсылықов.
Естеріңізге сал кетсек, Сақ патшайымы Тұмардың есімі ежелгі жазбаларда Томирис деп көрсетілген. Б.з.д. 530-529 жылдары Мидия патшасы Кир көптеген елдерді өзіне бағындырып, «Азия әміршісі» атағына ие болып, Ұлы далаға қарсы жорыққа шықты. Шайқастардың бірінде Кир патшасы Томиристің жұбайы Рүстемды өлтіріп, Тұмардың баласы Сыпырды қолға түсірген. Тұтқында Томиристің ұлы да мерт болды. Ал Кир көшпенділерге елші аттандырып, олардың ханшасына өзіне тұрмысқа шығуын талап етеді. Тұмар Кир патшаның ұсынысын қабылдамай, оның басын қанға тұншықтыруға уәде етеді. Осыдан кейін патшайым парсыларға қарсы ұрыс жүргізіп, жеңіске жетеді. Сол кезде Тұмар парсылардың патшасы Кирдің басын шауып алып, қан толтырылған сабаға тығып: «Аңсағаның қан еді, іш енді соны!» - деп айқайлады. Бұл оқиғаны грек тарихшысы Геродот «ең кескілескен және ұлы шайқас» деп суреттеген.