АСТАНА. Қыркүйектің 6-сы. ҚазАқпарат /Жасұлан Аманбайұлы/ - Сенбі күні, қыркүйектің 4-інде елордада ҚР Конституциясының 15 жылдық мерейтойына арналған «Ата Заңым - ардағым» атты автошеру өткізілді, деп хабарлайды ҚазАқпарат.  

«Отан қорғаушылар» алаңынан бастау алған автошеру барысында еліміздің Туымен безендірілген автокөліктер елорданың орталық көшелерімен жүріп өтіп, қала тұрғындарына Конституцияның қысқаша тарихы жазылған парақшалар таратты.

Мерекелік Іс-шара «Нұр Отан» ХДП-нің «Жас Отан» жастар қанатының және «Есірткісіз болашақ» жастар корпоративтік қоры бастамасымен ҚР Білім және ғылым министрлігінің қолдауымен ұйымдастырылған.

 «Бүгінгі іс-шараға 40 автокөлік қатысуда. Автошеру жастарымыздың жүрегіндегі патриоттық, отансүйгіштік сезімдерін оятуға бағытталған. Қазақстан Республикасының символдарына, Конституциясына деген құрметті көрсетуге талпынамыз», дейді Астана қаласының  ұйымдастыру-әдістемелік және тәрбиелік жұмыс басқармасының бастығы Шыңғысбек Сұлтанбеков.