АҚТӨБЕ.   Қыркүйектің  3-і.  ҚазАқпарат /Мирал Жармұхамбетов/ -  Конституция күні    Алға аудандық  ішкі істер бөлімінің   Мамандандырылған   күзет  қызметі басқармасы  взводының полиция   қызметкері Дуанбек Сарқытхан   тұрғын үйдегі  өрт оқиғасының   алдын  алды. 

Қызметтен қайтып  келе жатқан  ол   Байтұрсынов көшесіндегі  №15  үйдің     маңынан   түтіннің иісін сезеді.   Үйді айналып шыққан  ол, бірінші  қабатта      балкондардың бірі  өртеніп жатқанын көреді.   Пәтерге   енген   жалын    тұрғындардың өміріне  қауіп төндіреді.    Оқиға  туралы   полицияның кезекші  бөліміне,  өрт сөндіру  және газ қызметтеріне   хабар  берген    Сарқытхан,    үйге кіріп,    барлық пәтерлердің  тұрғындарын  оятып,      оларды көшеге  шығара бастайды.   Бірер   минуттан кейін  өрт сөндірушілер   келіп,  тілсіз жауды ауыздықтайды.

Кейіннен  анықталғандай,    өрт шыққан пәтердің  иелері   бұл  кезде      саяжайда  болып  шығады.  Саяжайдан  оралған олар, бірінші кезекте, полиция қызметкерін тауып алып,  оған алғыстарын білдірді  -   себебі  оның  қырағылығы  мен  жедел әрекеттерінің арқасында     өрт сөндірушілер    жалынды     дер  кезінде    сөндіріп,  өрттің  басқа  бөлмелерге таралуына  жол бермеген.

Ал Алға ауданының әкімі Қабай Сәрсенбаев  мамандандырылған   күзет  қызметі басқармасының бастығы Қайыржан  Даржановтың атына    хат жолдап,       азаматтық және қызметтік  борышын орындағаны  үшін  және    үйдің  тұрғындарын   жедел көшірудегі     білікті әрекеттері үшін полиция қызметкеріне алғыс айтты.