ПАВЛОДАР ОБЛЫСЫ. Қыркүйектің 2-сі. ҚазАқпарат /Вера Ливинцова/ - Павлодар облысы, Ертіс ауданы, Сілеті ауылдық округінің шалғайдағы Бұланбай ауылында бастауыш мектеп ашылды, деп хабарлайды облыс әкімінің баспасөз қызметі.

Жаңадан ашылған мекеменің сыныптары жарық, мектепке су құбыры тартылған, сантехникалық құрылғылар орнатылған.

Алғашқы қоңырау күні 1-4-ші сыныптың парталарына 16 бала отырды. Мектеп ғимаратында Бұланбай ауылының 12 бүлдіршіні баратын шағын орталық пен медициналық пункт бар. Білім беру мен мектепалды білім беру ғимараты қажетті құрал-жабдықтармен, жиһазбен жабдықталған.

Мектептің ашылу күні Ертіс ауданының әкімі Владимир Левченко ауыл адамдарын осы айтулы күнмен құттықтады. Мерекелік салтанат барысында оқушыларға балалар кітапханасы, спорттық керек-жарақтар, теледидар мен оқу ғимаратына қажетті басқа да заттар сыйланды.

Шалғайдағы Бұланбай ауылы гүлдену үстінде, ауылда жас мамандар мен жас отбасыларға арналған 10 пәтер салу жоспарлануда.