АСТАНА. Қыркүйектің 2-сі. ҚазАқпарат /Гүлнара Жандағұлова/ - Ильинка кетіндегі мектеп қараша айында пайдалануға беріледі. Бұл туралы «Нұр Отан» ХДП Астанадағы филиалының партиялық бақылау комиссиясы мен Жемқорлыққа қарсы күрес жөніндегі қоғамдық кеңесінің отырысында  Астана қаласы құрылыс басқармасының бастығы  Владимир Лютов мәлім етті.

Ильинка кетіндегі 1 200 орынға арналған мектеп мемлекеттік жекеменшік серіктестік бағдарламасы бойынша қаржыландырылып, шешімі табылмаған мәселесі көп нысанға айналған. Қазір бұл жерде 150-дей адам жұмыс істеп жатыр, деп хабарлады В.Лютов.

«Қараша айында біз мектепті пайдалануға береміз. Мектеп 100 пайыз қардыландырылған. Жобалық-сметалық құжаттама тексерілген. Осы құжаттамаға енбей қалған көптеген техникалық жұмыстар анықталды», - деді В.Лютов.

Сонымен қатар құрылысты аяқтамаған компаниялар құрылыс салуға рұқсат беретін лицензияларынан айырылып, олардың аттары адал жұмыс істемейтін мердігерлердің тізіміне жіберілді. «Яғни, бұл компания құрылысқа қатысты өткізілетін кез келген байқауларға ешқашан қатыса алмайды», - деп толықтырды В.Лютов.

Астанада 65 мемлекеттік мектеп, 14 мемлекеттік емес мектеп және бір кешкі мектеп бар.