АСТАНА.  Қыркүйектің 2-сі. ҚазАқпарат /Қанат Мәметқазыұлы/  - ЕҚЫҰ саммиті Қазақстанның жаһандық қауіпсіздік пен ынтымақтастыққа лайықты үлес қоса алатын беделді мемлекетке айналғанын көрсетеді. Бүгін Парламент Мәжілісінің алғашқы отырысында палата төрағасы Орал Мұхамеджанов осылай мәлім етті.

«Қазақстанның ЕҚЫҰ-ға төрағалық етуі аясында өтіп жатқан ағымдағы жыл еліміз үшін ерекше маңызды. Осындай беделді халықаралық ұйымға төрағалық етудегі табысымыз да аз емес. Оған ағымдағы желтоқсан айында өтетін ЕҚЫҰ  Мемлекет басшыларының саммиті дәлел. Қазақстанда мұндай саммит өткізу туралы шешім қабылдау оның әлеуметтік-экономикалық және қоғамдық саяси дамудағы қол жеткізген жарқын табыстарын объективті түрде тану болып табылады. Сонымен бірге бұл шара еліміздің жаһандық қауіпсіздік пен ынтымақтастыққа лайықты үлес қоса алатын беделді мемлекетке айналғанын айғақтайды», деді О. Мұхамеджанов.

Сонымен бірге палата төрағасы мұның барлығы еліміздің әлеуметтік бет бейнесін қалыптастырып, іргесін нығайтуға баға жетпес үлес қосқан Елбасының еселі еңбегі арақсында екендігін атап өтті. «Сондай-ақ мұның өзі Нұрсұлтан Назарбаевтың шынайы әлемдік ауқымдағы Елбасы ретінде танылып отырғанын көрсетеді», деді О. Мұхамеджанов.