АСТАНА. Қыркүйектің 1-і. ҚазАқпарат - Бүгін Мұнайлы ауданының Дәулет елді мекенінде № 4 жаңа орта мектеп өз есігін айқара ашты. 960 орындық жалпы білім беру орталығының ашылу салтанатына облыс әкімі Қ.Көшербаев қатысты.

Осыған дейін Дәулет ауылының балалары барлығы 250 орындыққа есептелінген мектептің ескі  ғимаратында үш ауысыммен білім алып келді.

Білім ордасының жаңа ғимаратында Мұнайлы ауданының Дәулет және Жаңа Дәулет, Қызылтөбе ауылдық округінің Ынтымақ, Бірлік елді мекендері балаларының жан-жақты дамуы мен білім алуына барлық жағдай жасалған. Мектепте 50 сынып, 2 спорт залы, 590 орындық акт залы, кітапхана, 276 орындық асхана, оқу шеберханасы бар. Педагогикалық ұжым құрамында 95 мұғалім мен 35 кіші қызметкер бар.

Естеріңізге сала кетейік, Мұнайлы ауданының негізі 2007 жылы Мемлекет басшысының Жарлығымен құрылған болатын. Алғаш рет мемлекетіміздің тәуелсіздігі жылдарында облыста жаңа әкімшілік-аумақтық бірлік пайда болды. Аудан қарқынды дамуда, халқының саны күннен-күнге өсіп келеді. Осы үш жылда ауыл тұрғындарының әлеуметтік жағдайының жақсаруы үшін бірқатар жұмыстар атқарылды.

 Мемлекеттік «Балапан» бағдарламасының аясында сондай-ақ, жаңа мектепте 75 балдырғанға арналған мектепке дейінгі шағын-орталық өз жұмысын бастайды.

Маңғыстау облысында білім беру жүйесіне айрықша мән беріледі. Соңғы төрт жыл ішінде  аталмыш саланы қаржыландыру төрт есеге өсіп, 24,4 млрд. теңгені құрап отыр. Өткен оқу жылы маңғыстаулық оқушылар республика түлектері арасында ҰБТ қорытындысы бойынша бірінші орынға ие болды.