ТАЛДЫҚОРҒАН. Қыркүйектің 1-і. ҚазАқпарат /Сандуғаш Дүйсенова/ - Талдықорған қаласының әкімдігінде балалар командалары арасында футболдан «Былғары доп-2010» чемпионаты және қала Кубогының жеңімпаздары мен жүлдегерлерін марапаттау рәсімі болып өтті.

Халықтың денсаулығын жақсарту мен өскелең ұрпақты салауатты өмір салтына баулу бағытындағы Елбасының бастамасын жүзеге асыру аясында облыс орталығында осындай дәстүрлі футбол ойындары өтеді.

Талдықорған қаласының әкімі Сәкен Жылқайдаровтың айтуынша, осы маусымда «Былғары доп-2010» чемпионатына жас ерекшелігі бойынша төрт команда және қала Кубогы сайыстарына үш команда қатысқан.

Бәйгеде барлығы 135 балалар командасы өнер көрсетті.

Жиналған қауымның қошеметімен қала әкімі жеңімпаздардың атын атады. 1995-1996 жылдары дүниеге келген балалардың командалары  арасынан №15 орта мектептің командасы бас жүлдеге лайық болды. 1997-1998 жылдары туғандар арасынан «Шығыс» командасы жеңімпаз атанды. 1999-2000 жылдары дүниеге келген ең кішкентай қатысушылар командалары арасынан «Самал-1» футбол командасы бірінші орынды алды. Қала Кубогы  №96 балалар мен жасөспірімдердің спорт мектебі мен «Жетісу-99» комадаларына бұйырды.