АСТАНА. Шілденің 31-і. ҚазАқпарат. Бүгін таңғы сағат бес жарымда Мерке қаласынан 10 шақырым жердегі Алматы-Ташкент тас жолының 339 шақырымында Шымкент қаласынан Алматыға бет алған «Мерседес-бенц» қалааралық автобусы «Норт-бенц» маркалы жүк көлігімен соқтығысты, деп хабарлайды ҚазАқпарат ҚР ІІМ баспасөз қызметіне сілтеме жасап.

Көліктер соқтығысқан кезде өрт туындап, нәтижесінде көліктер толығымен жанып кеткен. Оқиға орнында 20 адам, оның ішінде автобустың 18 жолаушысы, автобус жүргізушісі және жүк көлігінің жүргізушісі қайтыс болды. Алдын ала деректер бойынша автобуста 49 жолаушы болған.

Мерке аудандық орталық ауруханасына 23 жолаушы жеткізіліп, оларға медициналық көмек көрсетілді. Олардың алтауы, оның ішінде төрт Өзбекстан азаматы әртүрлі дене жарақаттарымен ауруханаға жатқызылды.

Көлік құралдарының иелері және қайтыс болған жүргізушілердің жеке бастары анықталды. Сонымен қатар, қайтыс болған жолаушыларды анықтау бойынша іс-шаралар жүргізіліп жатыр.

Министрлік басшылығының тапсырмасы бойынша ІІМ Жол полициясы комитеті төрағасының міндетін атқарушы полиция полковнигі Николай Калашников осы өңірге аттанып кетті.

Қазіргі уақытта оқиға орнында Жамбыл облысы ІІД-нің тәжірибелі қызметкерлерінен құралған арнайы тергеу тобы жұмыс істеуде. Жол-көлік оқиғасының себептері анықталуда, сондай-ақ автотехникалық, техникалық және бірқатар биологиялық сараптамалар тағайындалды. Алдын ала деректер бойынша жүк көлігінің жүргізушісі рульде ұйықтап кетіп, қарсы келе жатқан автобуспен соқтығысқан.

Бұрын 13 адам қаза тапты деп хабарланған болатын.