АСТАНА. Шілденің 31-і. ҚазАқпарат /Гүлмира Әлиакпарова/ - Биылғы жылы қуаңшылықтың салдарынан Батыс Қазақстан және Ақтөбе облыстарында егіс алқаптарының 70 пайыздан астамы күйіп кетті. Бұл туралы бүгін ҚР Ауыл шаруашылығы министрлігінің алқа мәжілісінде Жер шаруашылығы және фитосанитариялық қауіпсіздік департаментінің директоры Анна Буць мәлім етті.
«Ауа райы құрғақ болған биылғы жыл - агротехнологиялардың деңгейіне сынақ жүргізгендей болды. Олардың деңгейі жоғары болған өңірлерде егіс алқаптары сақтап қалынды. Соның арқасында астықтың соңғы он жылдағы орташа деңгейін биыл да ала аламыз деп айтуға болады», - деді ол.
А.Буцьтың айтуынша, жалпы республика бойынша дәнді-дақылдардың 83 пайыз алқабы жақсы және қанағаттанарлық күйде. Ал егіс далаларының 12 пайызы немесе 1,9 млн. гектары нашар жағдайда болса, 5 пайызы немесе 883 мың гектары жойылды.
«Нашар күйдегі егіс алқаптарының басым дені, яғни 641 мың гектары немесе 15 пайызы Қостанай облысында орналасқан. Ал Батыс Қазақстан мен Ақтөбе облыстарында сәйкесінше 63 және 72 пайыз егіс бүгінгі күні толығымен жойылып, жарамсыз деп танылды», - деді департамент директоры.
