АСТАНА. Шілденің 31-і.  ҚазАқпарат /Руслан Ғаббасов/  - Агроөнеркәсіптік кешеннің бәсекеге қабілеттілігін арттыру мәселелері алдыңғы қатарға шығарылып отыр. Бұл туралы бүгін «Қараөткел-2010» Қазақстанның агроөндірістік кешені жетістіктері жәрмеңкесінің салтанатты ашылуында Үкімет басшысы Кәрім Мәсімов мәлім етті.

«Біздің көз қуанатын, мақтан тұтуға болатын дүниелеріміз баршылық. Агроөнеркәсіптік кешен жоғарғы қарқынмен дамып келеді», - деп атап өтті Премьер-Министр.

«Қайта өңделген өнімнің номиналдық мәндегі көлемі еңбек өнімділігі секілді екі есеге дерлік өсті. Өңірлерде кез келген бастамаларды іске асыруға мемлекет жағдай жасап отыр. Бұл ауыл тұрғындарының да, агробизнесті дамытуға үлес қосып келе жатқан адамдардың да өздеріне сенімді болуына мүмкіндік береді», - деп тоқталды К.Мәсімов

Үкімет басшысы өз сөзінде биыл субсидиялаудың жаңа тетіктері іске асырыла бастағанын алға тартты. Бұл шаралар агроөнеркәсіптік кешенді жедел әртараптандыруға жағдай жасайды.

«Яғни, олар меншікті істі дамытуда ынталандыруға бағытталған», - деді Премьер-Министр.

«Агроөнеркәсіптік кешенді жаңғыртуға ықпал ететін инвестициялық жобалар ойдағыдай іске асып жатыр. Бұл ретте саланың бәсекеге қабілеттілігін арттыру мәселелері алдыңғы қатарға шығарылып отыр. Бұл Кеден одағының жұмыс істеу шарттарында әсіресе өзекті», - деп атап өтті К.Мәсімов.

Үкімет басшысы осыған ұқсас көрмелерді өткізу түрлі бағыттағы мамандардың мүдделері мен күш-жігерін біріктіруге ықпал ететін маңызды құрал екенін, сондай-ақ өңіраралық байланыстарды жаңғыртып, өткізу нарықтарының өсуіне ықпал ететінін атап өтті.