ОРАЛ. Шілденің 30-ы. ҚазАқпарат /Елжан Ералы/ - Жаңа кедендік кодекске қатысты өзгерістер облыстық кедендік бақылау департаменті мен «Нұр Отан» ХДП облыстық бөлімшесі бірлесе өткізген  қоғамдық консультативтік кеңестің кеңейтілген отырысында сөз болды, деп хабарлайды ҚазАқпарат тілшісі.

Қазақстан, Ресей және Беларусқа ортақ Кеден одағы кодексінің күшіне енгеніне де бір ай уақыт өтті. Сол кодекске сәйкес, биыл шілденің 1-інен бастап, үш елдің арасында тауарлар мен көлік құралдарын кедендік рәсімдеудің күші жойылып, экономикалық қарым-қатынастың тиімділігі артты. Оған дәлел БҚО-ға Ресейден енген тауарлардың үлесі былтыр 40 пайызды құраса, биыл ол көрсеткіш 45 пайызға жетті. Ал кедендік кедергілер жойылған соңғы 15 күн ішінде 58 пайызды құрады.

Отырысты облыстық кедендік бақылау департаментінің бастығы Әмірхан Мауқұлов қысқаша сөз сөйлеп ашты. Содан кейін департаменттің әр саладағы мамандары жаңа кодекске қатысты жиналғандарға жан-жақты түсінік берді. Соңынан кәсіпкерлердің сұрақтарына жауап қайтарды. Кеңеске облыс әкімінің орынбасары Берік Толымбаев пен «Нұр Отан» ХДП облыстық бөлімшесі төрағасының орынбасары Абат Шыныбеков қатысып, сөз сөйледі.