БРЮССЕЛЬ. Шілденің 29-ы. ҚазАқпарат /Димаш Сыздықов/ - Қазақстан Республикасының Бельгиядағы және Люксембургтағы   Елшісі,    Еуроодақ  және  НАТО  жанындағы   миссиялардың  басшысы    Ерік   Өтембаевтың    Люксембургтың   экономика  және  сыртқы  сауда министрі Жано  Креккемен   болған  кездесуінің  барысында  тараптар  Қазақстан мен Люксембургтың арасындағы екіжақты  экономикалық ынтымақтастықты әрі  қарай тереңдету   мәселелерін талқылады.

Атап айтқанда,   кездесу  барысында  қазақстандық дипломат Қазақстан мен  Люксембургтің      ұзақмерзімдік    экономикалық  ынтымақтастығының   жоспарын   жасаудың мүмкіндіктерін   қарауды  ұсынды.  Және бұл құжатқа      қаржы,  көлік,   металлургия және    жерсерік-навигация салаларындағы   өзара іс-қимылдар негіз бола алатынын  атап көрсетті. 

Бұл бастамаға қолдау білдірген    Ж.Крекке    мырза,     серіктестікті  дамытудағы қолда  бар  әлеуеттерге тоқталып өтті.   Оның айтуынша,  «Люксембургтың инвестицияларын және  ғылыми-техникалық   әлеуетін   тарту,  Қазақстанның  ең алдымен     өңдеуші салалары  үшін тартымды».

Қазақстан елшісі  кездесу  барысында, сондай-ақ  Еуропалық   инвестициялық банктің   Қазақстандағы   жұмысының    сәтті басталғаны  жайлы   баян етіп,    Банкпен   арадағы келісімге  қол қойылған  сәттен бастап  тараптардың       бірқатар жобаларды әзірлеуге кіріскенін  айтты.     Ж. Крекке   өз  кезегінде,   Қазақстан  мен  Еуропалық инвестициялық банктің   ағымдағы өзара  іс-қимылына   жоғары  баға беріп,   Банктің  қаржылық тетіктері   екіжақты  инвестициялық диалогты   кеңейте  және нығайта түсетінін атап көрсетті.

Сөз  соңында  тараптар   Қазақстан мен Люксембургтың арасындағы    келісімшарттық-құқықтық базаны,  әсіресе   қаржы,  көлік,   металлургия,  жерсерік-навигация салаларындағы  базаны   тереңдету  және   нығайту мүмкіндігін  қарастыруға  келісті.