КӨКШЕТАУ. Наурыздың 20-сы. ҚазАқпарат /Жанмұрат Жанайдаров/ -Шоқан Уәлиханов атындағы Көкшетау мемлекеттік университетінің студенттері мен ұстаздар қауымы «Ғасырдан жеткен құт мереке» салтанатты кешінің ұйытқысы болып,

 білім шаңырағында Наурыз мерекесін көтеріңкі көңілмен тойлады, деп хабарлайды ҚазАқпарат тілшісі.

 Университет ректоры Шәкір Ыбыраев Наурыз мерекесінің ашылуында барша жиналған қауымды Ұлыстың ұлы күнімен құттықтап, жақсылықтың жалғасын тауып, білім жолында табысқа жете берулеріне тілектестігін білдіріп, оң батасын берді. Тойды жастардың өздері жалғастырып, осындағы этномұражайда халқымыздың салт-дәстүрін, әдем-ғұрпын көпшілікке көрсетуге тырысты. Ұлттық киімдегі ұйымдастырушылар меймандарды әсем ән , күмбірлеген күй, мың бұралған билерімен қарсы алып, наурыз көже ұсынды. Айтыс ақындары жырдан шашу шашып, жыр додасының көрігін қыздырды. Қолданбалы өнер туындыларының көрмесі ,университет ғалымдарының ғылым жолындағы жетістіктері, оқу орнының бүгіні мен ертеңі арнайы көрмеден көрініс тапқан. Студентер қалашығындағы наурыз мерекесі өз салтанатымен жалғасын тауып, спорт сайысына ұласты.