ТАЛДЫҚОРҒАН. Наурыздың 19-ы. ҚазАқпарат /Сандуғаш Дүйсенова/ - Бүгін облыс әкімі Серік Үмбетов наурыздың 12-сінде су тасқынынан зардап шеккен Қызылағаш ауылының қираған орнында жаңа ауыл құрылысының алғашқы тасын қалау салтанатына қатысты.

Облыс әкімі баспасөз қызметінің хабарлағанындай, Шоқан Уәлиханов көшесінде ауыл тұрғыны Нұрсұлтан Жұмадиярдың төрт бөлмелі, жалпы ауданы 80 шаршыметрлік үйінің құрылысы басталды. Үйде төрт тұрғын бөлмемен бірге, кең холл, асхана, аш ішетін бөлме, ванна және дәретхана көзделген. Үйге су құбыры кіргізіледі. Тұрғын үй кірпіштен салынып, төбесі металл шатырлы жабынмен жабылады.  

Жаңа үйді «Ауыл-Құрылыс» құрылыс компаниясы салуда, олар мұнда тағы 12 үй тұрғызады. Құрылыс жұмыстарына барлығы 26 компания кірісті, ертең тағы 21 компания жұмысқа кіріседі. Сондай-ақ резервте 55 құрылыс ұйымдары тұр. Ауылда барлығы 467 үй салынады.

Н.Жұмадияр оның отбасының, бүкіл ауыл тұрғындарының тағдырына қатысып отырғандардың бәріне, ең алдымен ел Президентіне, құтқару қызметінің қызметкерлеріне, қайғыға ортақтасып, үн қосқан, барынша көмек көрсетіп жатқан барлық қазақстандықтарға алғысын айтты.

Ауылдың басқа да тұрғындары, көше комитеттерінің өкілдері, ақсақалдар алғысын білдірді. Олардың айтуынша, ауылдағы өмір жанданып келеді, ең бастысы адамдарда жақсы болашаққа да деген үміт пен сенім ұялады.