КӨКШЕТАУ. Наурыздың 19-ы. ҚазАқпарат /Жанмұрат Жанайдаров/ -Ақмола облыстық ішкі істер департаментінде өткізілген брифингте атап көрсетілгендей, наурыздың 10-ы мен 17-сі аралығында өткізілген республикалық «Допинг» іс -шарасы барысында есірткімен байланысты 64 қылмыстық әрекет тіркеліп, он келі есірткі заты тәркіленген,

деп хабарлайды ҚазАқпарат тілшісі.

Облыстық есірткі бизнесімен күрес басқармасының бастығы Қанат Нұрмағанбетовтың айтуынша, маңызды шараға ішкі істер департаментінің барлық құрылым қызметкерлері, халық жасақшылары, жастар бірлестіктері мен қоғамдық ұйымдар өкілдері жұмылдырылған. Нәтижесінде заңсыз есірткі айналымына қатысты 41, жүйкеге әсер ететін дәрі-дәрмекті заңсыз сатуға орай -2 қылмыстық іс қозғалған. Аз мөлшерде есірткі сақтауға орай 21, лицензия берудегі заңсыздыққа -2 әкімшілік тәртіпке шақыру шарасы қолданылды. Осы уақытта есірткімен байланысты жұмыс жасайтын 12 емдеу-алдын алу мекемесінде, 14 дәріханада, 8 өнеркәсіп орнында тексеріс өткізілген. Соның барысында Щучье қаласындағы «Орталық дәріханада» жүйке ауруына берілетін «Нозепам», «Фернобарбитал» дәрілері заңсыз босатылғаны анықталды. Степногор қаласында 1750 келі «Натрий Цианитін» сақтау хауіпсіздік ережесі бұрмаланған. Осындай әрекет «Құнарлы» жауапкершілігі шектеулі серіктестігінде де орын алған.  Көкшетау қаласындағы «Сабантой» мейрамханасында есірткі саудасы оқиғасы анықталды.

Жалпы, ағымдағы жыл басынан бері есірткімен байланысты 114 қылмыстық оқиға тіркеліп, заңсыз айналымнан 35 келі көкнәр тәркіленген.