ОРАЛ. Наурыздың 19-ы. ҚазАқпарат /Елжан Ералы/ - М.Өтемісұлы атындағы Батыс Қазақстан мемлекеттік университетінде мектеп оқушылары арасында облыстық олимпиада өткізілуде.

Облыстық білім басқармасы бастығының орынбасары Нұрлан Сабыровтың ҚазАқпарат тілшісіне хабарлағанындай, білім сайысына аудандар мен қаладан үшінші турға іріктеліп келген 363 үміткер қатысуда. Олар барлығы 13 пәннен білімдерін сынауда. Екі күнге созылатын олимпиада бүгін қорытындыланады.

Жеңімпаздар төртінші турға өтіп, олардың жұмыстары сұрыптаудан өткізіледі. Республикалық байқауға өткендер сәуір айында Қызылорда қаласында болатын бесінші турда бақ сынайды.

Сонымен қатар Орал қаласындағы дарынды балаларға арналған С.Сейфуллин атындағы №11 облыстық мектеп-интернаты кешені базасында наурыздың 25-30-ы аралығында шетелде тұратын қазақ балалары үшін «Қазақстан - ата жұртым, қасиетім - ана тілім» деген тақырыпта жетінші халықаралық олимпиада өткізілгелі отыр. Онда оқушылар қазақ тілі мен әдебиетінен сынға түседі.  Қазірдің өзінде Қытай, Ресей, Франция елдерінен қатысам деушілер бар.