КӨКШЕТАУ. Наурыздың 19-ы. ҚазАқпарат /Жанмұрат Жанайдаров/ - Көкшетау қалалық сотының шешімімен Ақмола облыстық әділет департаментінің бөлім бастығы пара алу кезінде қолға түсіп, үш жылға бас бостандығынан айырылды,

 деп хабарлайды ҚазАқпарат тілшісі облыстық соттың баспасөз қызметіне сілтеме жасап.

 П.есімді мемлекеттік қызметші жеке кәсіпкердің үстінен қозғалған әкімшілік істі жауып, алдағы уақытта «қамқоршы» болу қызметін 190 мың теңгеге бағалап, еңбегіне осынша сыйақы тағайындаған. Кәсіпкер қаржы полициясына өтініш жасап, күдікті айғақты дәлелдермен қолға түскен болатын. Осы заңсыз әрекетіне орай лауазым иесінің үстінен ҚР ҚК-сінің 311-ші бабы 2-ші тармағына сәйкес қылмыстық іс қозғалып, тергеу жүргізілген. Сотта қаралған қылмыстық әрекет толықтай дәлелденіп, сыбайлас жемқорлықтың барлығы анықталды. Сот шешімімен жазасын өтеушінің мемлекеттік органда бес жылға дейін қызмет етуге болмайтыны турасында үкім шығарылды.