Орталық алаңда және Әуезов алаңында, теміржол вокзалы, силикат зауыты маңында және «Көктем» базарында 40-тан астам киіз үй тігіледі. Әрбір киіз қалашығының өз атауы болмақ. Айталық, мереке күні семейліктер Абай, Шәкәрім, Әуезов, Алтынсарин және Алашорда ауылдарында болады.

Наурыз мейрамына әзірлікті ұйымдастыру комиссиясы киіз қалашықтарын безендіруге талаптар қойды. Ең таңдаулы киіз үй байқауында оның ішкі жасаулануы, қазақ халқының қолданбалы өнерін көрсетуі, дәстүрлер мен салттарды бейнелеуі ескеріледі. Барлық алаңдарда наурыз-көже таратылып, ұлттық тағамдар ұсынылады.

Мереке наурыздың 22-сі күні орталық алаңдағы театрландырылған шеруімен басталады. Бұл күні сондай-ақ арнайы алаңдарда спорт сайыстары, көркем шығармашылық және қолданбалы өнер көрме-жәрмеңкесі, көркемөнерпаздар ұжымдары мен ұлттық-мәдени орталықтардың концерттері жоспарланып отыр.