АСТАНА. Наурыздың 18-і. ҚазАқпарат /Айдар Оспаналиев/ - Прокуратура органдары азаматтардың еңбек және әлеуметтік құқықтарын қорғау жұмыстарын жалғастыруда. Жыл басынан бері олар азаматтардың 1,5 миллиард теңгеден асатын айлық жалақыларын алуына ықпал етіп, 32 мың еңбеккердің бұзылған құқықтарын қалпына келтірді.

 Бұл туралы бүгін журналистермен болған брифингте Бас прокуратураның ресми өкілі Нұрдәлет Сүйіндіков мәлім етті, деп хабарлайды ҚазАқпарат.

Оның деректері бойынша, Алматыда прокурорлардың ықпалымен «Темірбетон» жауапкершілігі шектеулі серіктестігінің өкілдері 400 жұмысшының 10 миллион теңгеден асатын айлық жалақылары  бойынша қарыздарын өтеді. Ал Солтүстік Қазақстан облысындағы «Краснополянское» серіктестігі жұмысшыларға 12 миллион теңге көлеміндегі берешектерін қайтарды. «Азаматтардың еңбек құқықтарын бұзғандарды жауапқа тарту мәселесі прокуратураның басты назарында. Мысалы Атырау облысының Жылыой ауданының прокурорлары «Нұр Жылыой» жауапкершілігі шектеулі серіктестігінің жетекшісіне айлық жалақыны бірнеше рет кешіктергені үшін қылмыстық іс қозғады», деді ресми өкіл.