ШЫМКЕНТ.  Наурыздың 18-і.  ҚазАқпарат /Татьяна Пылаева/ -  Оңтүстік Қазақстан  облысына жұмыс сапарын қорытындылаған   сөзінде   Елбасы Нұрсұлтан Назарбаев      барша қазақстандықтарды Наурыз мейрамымен  құттықтады.

«Біздің  халқымыз ХХІ ғасырдың екінші  онжылдығына жаңа  міндеттермен аяқ басып отыр.     Және    индустриялық-инновациялық бағдарламаның  арқасында  еліміз   жаңа деңгейге көтерілуі тиіс. Дағдарыс,    тек  қана шикізатқа арқа сүйеуге  болмайтынына,  ол шикізаттың  да бір күні  таусылатынына көзімізді жеткізді.  Әлемдік бағаның  тербелістері,   конъюнктура,     біздің  өте   терең   орға түсіп  қалуымыз  мүмкін екенін көрсетіп  отыр.  Ал  егер,  біз қазір айналысып отырғандай,   шикізаттық емес өндірісті  дамытатын  болсақ,   онда экономиканың   орнықтылығы тұрақты болады. Бүгінгі жағдайды  пайдалана отырып,   мен   Оңтүстік Қазақстанның  халқын және   барша қазақстандықтарды     келе жатқан   Наурыз мейрамымен  құттықтағым,     оларға    көктемгі көңіл-күй,    жақсы жыл,   баянды бақыт,    тыныштық, әрбір отбасына   бақуаттылық тілегім келеді», деді  Елбасы өз сөзінде.