КӨКШЕТАУ. Наурыздың 18-і. ҚазАқпарат /Жанмұрат Жанайдаров/ - Астананың азық-түлік белдеуін іске асыру мақсатымен ағымдағы жылы жалпы сомасы 12,7 миллиард теңгені құрайтын 12 инновациялық серпінді жоба шешімін табатын болады,

 деп хабарлайды ҚазАқпарат тілшісі облыстық экономика және бюджеттік жоспарлау басқармасының мәліметіне сілтеме жасап.

 Жыл басынан бері елорданың сауда орындарына Ақмола облысы ауыл шаруашылығы құрылымдарынан 2,7 мың тонна сүт және сүт өнімдері, 1,2 мың тонна ет пен ет өнімдері, 11,2 миллион дана жұмыртқа жөнелтілген. Өсім өткен жылдың тиісті кезеңімен салыстырғанда ет пен сүт бойынша 3-5,5 пайызға, жұмыртқа 1,9 есеге артып отыр. Аймақта елорданың азық-түлікке деген сұранымын қамтамасыз ету мақсатымен жыл ішінде төрт бордақылау алаңы, екі жылыжай, бір көкөніс қоймасын салу, Бурабай мен Целиноград аудандарындағы құс фабрикаларын қайта жарақтау, сүт өңдеу кешенін жандандыру қолға алынып, шешімін табады.