Бұл қоғамдық    биржалар     облыс  орталығында, Екібастұз және  Ақсу  қалаларында    мемлекеттік әлеуметтік  тапсырысты  орындаумен  айналысады.

 «Жастарды  еңбекпен қамту  -   біздің  жұмысымыздың   негізгі бағыттарының бірі.  Әлеуметтік  зерттеулердің    қорытындысына сүйенсек,  14 пен 29 жастың аралығындағы  азаматтардың  үштен бірінің   басындағы өзекті    проблема -  жұмыс мәселесі»,   -  деп атап көрсетті  Павлодар  облысының ішкі саясат  басқармасының бастығы  Айзада  Құрманова.

 Жоғары  оқу  орындарының, колледждер мен  кәсіптік лицейлердің  түлектеріне арналған  Үкіметтің   «жастар тәжірибесі»  бағдарламасы      жастар үшін  еңбек нарығындағы қосымша     қолдау болып  отыр.   Өткен  жылы    облыстың   729 кәсіпорны мен ұйымында 2737  жас маман   тәжірибеден өткен болатын.   Олар  4-6  айда тәжірибе  жинақтап,   өздерін   көрсете  білді,  көпшілігі тұрақты жұмысқа ие болды.

 Ал ауыл  жастарының проблемаларын  «Ауыл жастары» бағдарламасы  шешуде.    Осынау  бағдарлама  аясында     318 жас  ауыл тұрғыны   қоғамдық жұмысқа  тартылды, 390   жас   кәсіптік  оқуға    жолдама алды,  30-ге жуық    жас   әлеуметтік  жұмыс орындарына тұрды.