ПАВЛОДАР.  Наурыздың  18-і.  ҚазАқпарат /Вера Ливинцова/ - Кеше    Павлодар облысы әкімдігінің кеңейтілген   мәжілісінде облыстың бас санитарлық дәрігері Қанат  Сакиев   №53     балабақшадағы  балалардың  тамақтан жаппай   улану фактісі  туралы     баян етті. 

25  сәбидің ата-анасы  дәрігерлерден  көмек  сұраған,  18 бала  «орташа ауыр» жағдайда    балалар  инфекциялық  ауруханасында жатыр.

 «Осыдан бір  ай  бұрын    осы балабақшаны тексеру  кезінде  мемлекеттік санитарлық-эпидемиологиялық қадағалау  қызметкерлері    асханада көптеген  келеңсіз фактілерді  анықтаған  болатын.  Шикі ет  өнімдері  сүтпен қатар тұрған,     ұн  беті ашық  ыдыста  сақталған,   ет  осатын      тақтайшалар да   дұрыс сақталмаған.    Асхананы    санитарлық  нормаларға  сәйкестендіру  туралы   ұйғарымды    балабақша  қызметкерлері  құлағына да ілмеген», деп   хабарлады бас санитарлық дәрігер.

Балабақша    каратинге  жабылды,    орын алған  оқиға  бойынша қылмыстық іс қозғалып отыр.

 Әкімдік  мәжілісінде   барлық балабақшалар  мен  мектептердің асханаларын   тексеру  туралы тапсырма берілді.