ПАВЛОДАР.  Наурыздың  17-сі. ҚазАқпарат /Вера Ливинцова/ -  Павлодар облысының әкімі  Бақытжан  Сағынтаев  аймақ халқын    Қазақстанның  оңтүстігіндегі  су тасқынынан    қираған  ауылдардың  тұрғындарына көмек көрсетуге    үндеді. 

«Алматы  облысындағы  «Қызылағаш» су  қоймасындағы  апаттың салдарынан   оның төңірегіндегі   елді мекендердің  тұрғындары зардап шекті. Тосыннан келген  апат салдарының ауырлығы соншалық,     жалпыхалықтық  көмек керек болып  отыр.   Тұрғындарды,   кәсіпкерлерді,  кәсіпорындар  мен    ұйымдарды      осынау  төтенше  оқиғаның     құрбандарына  қаржы  жинау   жөніндегі қайырымдылық  акциясына белсенді атсалысуға   шақырамын»,  деді әкім өз сөзінде.

Б.Сағынтаев,  павлодарлықтардың  бұл игі істен тыс қалмай,  қолдарынан  келгенше көмек көрсететіндеріне сенім білдірді.   Қаржы жинау  үшін  облыста есепшот ашылып  отыр. 

Әкімнің аппараты     мұқтаж жандарға   көмекке    біркүндік жалақыларын  аудару  туралы  шешім қабылдады.       Павлодар  облысы  бюджеттен   50 миллион теңге  аударады.