ШЫМКЕНТ.  Наурыздың 16-с. ҚазАқпарат /Татьяна Пылаева/ - Бүгін Алматы облысына Шымкенттен дәрі-дәрмек тиелген көлік аттандырылды. Бұл - «Қызылағаш» су қоймасы бұзылуынан зардап шеккен адамдарға «Химфарм» АҚ ұжымының көмегі.

«Біздің зауыт ұжымы Қызылағаш ауылындағы оқиғаны терең қайғыру сезімімен қабылдады. Елбасының, біздің зауыттың «Нұр Отан» ХДП бстауыш ұйымының, компания басшылығының бастамасымен қайырымдылық акциясын өткізіп, осы оқиғаға ұшырағандарға барлық қажетті дәрі-дәрмектерді жіберуге ұйғардық», деді «Химфарм» АҚ бас директоры Рүстем Байғарин.  

«Қайғылы оқиға болған жерге 200 мың ампула, 100 мың таблетка, 25 мың флакон әртүрлі дәрілер, 7 мың флакон жағатын май, жөнелтілді. «2008 жылы біздің облысымызда су тасқыны болғанда бүкіл ел көмектескенін жақсы білеміз. Енді біздер Қызылағаш тұрғындарына көмектесуге тиіспіз», - деді «Химфарм» АҚ еңбек ұжымы кеңесі» қоғамдық бірлестігінің төрағасы Сергей Пенчев.

Зауыттықтар акциясын «Нұр Отан» ХДП Оңтүстік Қазақстан филиалының барлық қызметкерлері қолдап, зардап шеккендердің арнайы шотына бір күндік еңбекақыларын аударды.