АСТАНА. Наурыздың 15-і. ҚазАқпарат /Айдар Оспаналиев/ - Елімізде    итбалықтардың  саны өте үлкен қарқынмен азайып келеді. Оған адам өміріндегі күнделікті тұрмыс-тіршіліктен келетін зиянды әрекеттер себеп болып отыр. Бұл туралы бүгін Каспий жағалауы елдерінің сарапшыларының итбалықтарды қорғауға арналған ерекше аймақ құру жөніндегі аймақтық кездесуінде қоршаған ортаны қорғау вице-министрі Елдана Сәдуақасова мәлім етті,

деп хабарлайды ҚазАқпарат.

Оның  сөзіне қарағанда, теңіздегі жалғыз ғана сүтқоректі жануардың жоғалып бара жатқанына адами факторлар арқылы келетін зияннан басқа да себептер баршылық. «Мысалы, біз Каспийден өте белсенді түрде балық аулаудамыз. Ал балық итбалықтардың ең негізгі қоректерінің бірі. Сонымен қатар қазір климаттың өзгеруі де олардың өсу қарқынына зиянын тигізіп отыр», деді вице-министр.

Оның сөзіне қарағанда, соңғы бірнеше жылда Каспийде мұздықтар деңгейі өте күрделі қалыптасып отыр. Бұл өз кезегінде итбалықтардың көбеюіне зардабын тигізуде. Өйткені жаңа туылған итбалықтың баласы мұзда ғана аяғынан тік тұрып кете алады. Сонымен қатар бұл үдеріс  теңіз жануарының иммундық жүйесіне де әсерін тигізеді. «Бұған қоса айта кететін мәселе, біз соңғы уақытта жер қойнауын пайдаланушылардың қызметіне мониторинг жүргізіп отырмыз. Бұл бағыттағы жұмыстар да итбалықтардың көбеюіне өзіндік зардабын тигізуде», деді Е.Сәдуақасова.