ПАВЛОДАР. Наурыздың 13-і. ҚазАқпарат /Вера Ливинцова/ - «Жеке адамның әлеуметтік бейімделуін қалыптастыруда ұлттық спорт түрлері» деген тақырыпта Қазақстанның, Ресейдің, Моңғолияның және Қытайдың ғалымдары Павлодар мемлекеттік институтында наурыздың 26-сында өтетін халықаралық ғылыми-практикалық конференцияда талқылайды,

деп хабарлады институттың баспасөз қызметі.

Басты назар ұлттық спорт түрлерінің әдістемелік проблемаларына және ат спорты мамандарын даярлаудың ғылыми-педагогикалық қырларына аударылмақ.  

Ұлттық спорт түрлері - қарапайым жаттығулардан бастап спорттың олимпиадалық түрлеріне дейінгі дене тәрбиесінің құрамдас бөлігі. Бүгінде республикада 200 мыңнан астам адам қазақша күреспен, тоғызқұмалақпен және ат спортымен айналысуда.

Конференция қатысушылары үшін «Ат әбзелдері» көрмесі әзірленуде. Конференция материалдары ғылыми мақалалар жинағы түрінде жарық көрмек.